Олунньу 14 күнүгэр «Төрөөбүт тыл уонна сурук -бичик» күнүгэр аналлаах А. Ф. Шестаков аатынан улуустааҕы норуот айымньытын дьиэтэ Н.М Рыкунов аатынан киин библиотеканы кытта холбоһуктаах «САХАМ ТЫЛЫН ДЬИКТИЛЭЭХ ХОНУУТА» диэн алта түһүмэхтэн турар күрэх ыытылынна. Төрөөбүт тылга аналлаах тэрээһиҥҥэ Нам сэлэнньэтин олохтоохторуттан турар 4 түмсүү кэлэн кыттыыны ылла. Хас кэлбит ыалдьыты алаадьылаах айах тутан көрүстүлэр.
Күрэх устатын тухары, өс хоһооннорун ребуһунан таайдылар, кылгас айымньы айдылар.
Саамай сөбүлээбит түһүмэхтэринэн, былыргы латыынныы алфавитынан суруллубут тиэкиһи бары көмөлөөн мүнүүтэҕэ ааҕыы буолла. Бу түһүмэххэ «Буойун» хамаандаттыттан Владислав Васильев улаханнык иҥнибэккэ ааҕан соһутта.
Кыттааччыларбыт, бэрт сэргэх дьон буоланнар, эр тэҥий эрбии биитин курдук киирсэн, биэтэккэ бастакынан «Айталы Куо» түмсүү кыайыылааҕынан таҕыста уонна анал бирииһинэн, дипломунан наҕаарадаланна. Онтон «Буойун», Женсовет уонна Аҕа сүбэтин түмсүүлэрэ туоһу сурукатары туттулар. Хас биирдии кыттааччыга саха ийэ тылын, сиэрин-үгэһин куруутун киэҥ эйгэҕэ тарҕата сылдьыҥ диэн алҕаан туран, ыраастанар, анал хаалаах арчыланар боҕоруоскай от бэлэх буолла.
Бириэмэни биллэрбэккэ хаалбыт олус интэриэһинэй, көрдөөх тэрээһин Сомоҕолоһуу сылынан, Вера Цыпандина оһуокайынан түмүктэннэ.
Кыттааччылар даҕаны, тэрийээччилэр даҕаны бары олуһун астыннылар. Инникитин маннык сахалыы тыыннаах тэрээһиннэргэ көрсүһүөх буолан тарҕастыбыт.
А.Ф. Шестаков аатынан улуустааҕы Норуот айымньытын дьиэтин
Тыл маатсарыстыбатыгар круһуок салайааччыта
Вера Цыпандина
