Олунньу 17 күнүгэр «Ленскэй нэһилиэк» МТ баһылыга Петр Григорьевич Сокольников 2022 сыл түмүгүнэн саамай бастыҥ ситиһиилээх үлэлээх дьонун-сэргэтин, тэрилтэлэрин, общественнай түмсүүлэрин, түөлбэлэрин, көхтөөх, спортсменнарын, инникилээх ыччаттарын, ытык ветераннарын чиэстээн, номинациялары туттарар үөрүүлээх дьоро тэрээһинэ буолла.
Ааспыт 2022 сыл Россияҕа норуоттар культурнай нэһилиэстибэлэрин, Саха сиригэр Ийэ, Саха автономията төрүттэммитэ 100, Нам улууһугар биир дойдулаахпыт, биллиилээх судаарыстыбаннай уонна политическай диэйэтэл, Саха Чулуу уола Максим Кирович Аммосов төрөөбүтэ 125 сылларыгар анаммыта. «Ленскэй нэһилиэк» муниципальнай тэриллии баһылыгын 2022 сыл тохсунньу 12 күнүнээҕи 12 №-дээх Дьаһылынан Аҕа сыла биллэриллибитэ. Бу сылга нэһилиэкпитигэр киэҥ далааһыннаах үлэ ыытылынна. Ону сэргэ, олох-дьаһах эйгэтин тупсарыытыгар үрдүк көрдөрүүлээх үгүс хамсааһыннар, ситиһиилэр кэккэлэстилэр. Эркээйилээх этиилэрин, төлөннөөх эҕэрдэлэрин «Нам улууһа» МТ баһылыга Юрий Иннокентьевич Слепцов, «Ленскэй нэһилиэк» МТ баһылыга Петр Григорьевич Сокольников эттилэр уонна нэһилиэккэ таһаарыылаах, сыралаах үлэлэрин, кылааттарын иһин Үрдүк Бэлиэлэри, наҕараадалары, махтал суруктары туттардылар.
Саамай үөрүүлээх уонна долгутуулаах чааһынан — анал ааттары иҥэрэн, дипломнары, сибэкки дьөрбөтүн кытта сыаналаах сертификаттары туттарыы буолла. Ол курдук, нэһилиэккэ тус кылааттарын киллэрсибит, нэһилиэк үтүө аатын чиэстээхтик көмүскээбит түөлбэлэр, үөрэх тэрилтэлэрэ, үөрэнээччилэр, патриоттар, социальнай-экономическай хабааннаах үлэҕэ өрүү көмө-тирэх, өйөбүл буолар урбаанньыттар уонна тэрилтэлэр, общественнай түмсүүлэр, спортсменнар, тэрилтэлэр икки ардыларынааҕы Спартакиадаҕа кыайыылаах хамаандалар өрөгөйдөөтүлэр.
Быйылгы сылга, өрөспүүбүлүкэҕэ физическай хамсааһын тэриллибитэ 100 сылынан, Лиэнскэй нэһилиэккэ, спорт ветераннарын спортивнай кулууптарын икки ардыларыгар Спартакиада аартыга үөрүүлээх быһыыга-майгыга арылынна. Бу киэҥ далааһыннаах тэрээһиҥҥэ «Урожай», «Буревестник», «Спартак», «Динамо», «Трудовые резервы», «Локомотив» спортивнай кулууптара кыттыахтара.
Тэрээһин биир сүрүн суолтатынан — 2022 сылга биллэриллибит Аҕа сылын түмүктээн, нэһилиэккэ Аҕа сүбэтин кытта тэҥҥэ үлэлэспит холобур буолар аҕалары наҕараадалаан, кинилэргэ махтанан, «Аҕа сыла» былааҕы 1-Хомустаах уонна Көбөкөн нэһилиэктэригэр туттарыы буолла. Ону сэргэ, үлэ-дьаһах тупсуутугар, олорор түөлбэни таптыырга, ытыктыырга иитиигэ анаммыт, биир санаанан дьону-сэргэни түмэр, көҕүлүүр сыаллаах, «Ленскэй нэһилиэк» муниципальнай тэриллии баһылыгын 2023 сыл тохсунньу 12 күнүнээҕи 28№ Дьаһалынан, үүммүт 2023 сыл Ленскэй нэһилиэккэ Эйэ уонна Үтүө санаа сылынан биллэрилиннэ.
Тэрээһин устатын тухары үҥкүүнэн «Ай-Ледис» (салайааччы Римма Татаринова), «Эҥсиэли Хотуттара», «Ил-Куо» ырыа ансаамбыллара (салайааччы Ирина Неустроева), Сандр Находкин киэргэттилэр. Ону сэргэ, Саха эстрадатын артыыстара, Саха Өрөспүүбүлүкэтин культуратын туйгуннара Анастасия Готовцева, Виктор Иванов-Сиэйэ Уола ылбаҕай ырыаларын бэлэхтээтилэр, иллюзионист Алексей Гольдеров Эйэ уонна Үтүө санаа сылынан холууптары көтүттэ, абылыыр талаанын көрдөрдө.
Түмсүүлээх Ленскэй нэһилиэк инникитин даҕаны сомоҕолоох буоллун диэн туран, Саха Өрөспүүбүлүкэтин культуратын туйгуна, мелодист Афанасий Татаринов бэйэтэ суруйбут ырыатынан тэрээһин суолтатын чиҥэттэ.
Саха сиэринэн, кэлбит кыттааччылары барыларын биир сомоҕоҕо түмэн, Владимир Осипов оһуохайынан үөрүүлээх быһыыга-майгыга ыытыллыбыт тэрээһин түмүктэннэ.
Эҕэрдэ эриэккэһэ буоллун ытык-мааны дьоммутугар, бастыҥ үлэлээх тэрилтэлэрбитигэр, салайааччыларыбытыгар, өрүү өйүүр урбаанньыттарбытыгар, спортсменнарбытыгар, көхтөөх ыллам ыччаппытыгар!
Саҥа былааннаргыт торумнанан,
Саҥа сүүрээннэр олоххо киирэн,
Сатабыллаах салайыынан сирдэтэн,
Салҕыы сайдыҥ, чэчирээҥ!
