Балаҕан ыйын 27 күнүгэр, Саха Өрөспүүбүлүкэтин Судаарыстыбаннаһын күнүн көрсө, Санкт-Петербург фотограва Андрей Жилин «САХА. Топографическай мэтириэттэр» авторскай хаартысканан быыстапкатын арыллыыта буолла. «САХА. Топографическай мэтириэттэр» култуураны уонна историческай нэһилиэстибэни харыстыырга, сайыннарарга уонна хаҥатарга аналлаах, Саха сирин норуоттарын культуратын тарҕатарга, наука уонна этнография салааларын сайыннарарга, ону тэҥэ көрөөччүлэри кытта тус санааларын уонна иэйиилэрин үллэстэргэ культурнай — социальнай бырайыак буолар. Андрей Викторович 2016 сыллаахха бырайыакка матырыйаал хомуйарга Саха сиригэр иккитэ сылдьыбыт. Бу кинигэ-альбомҥа Нам улууһун, Хаҥалас, Дьокуускай, Мирнэй куораттар туруу үлэһит дьонун күннээҕи олохторо, төрүт культураны фольклору тарҕатааччылар, Сахабыт сирин, төрөөбүт дойдубут кэрэ айылҕатын түһэрэн үйэлээх дьоһун бэлэх буолла.
Тэрээһиҥҥэ быыстапка геройдарын хаартыскаҕа үйэтитиллибит дьоммут-сэргэбит ыҥырыылаах ыалдьыттарынан буоллулар. Эҕэрдэ тылы «Нам улууһа» муниципальнай тэриллии баһылыгын солбуйааччыта Мария Семеновна Игнатьева, Саха Өрөспүүбүлүкэтин национальнай библиотека библиотечнай информационнай киинин сэбиэдиссэйэ Валентина Викторовна Илларионова, Саха сирин народнай худуоһунньуга, Саха Республикатын культуратын үтүөлээх үлэһитэ, Российскай Федерация худуоһунньуктарын уонна суруналыыстарын сойууһун чилиэнэ, Нам улууһун бочуоттаах олохтооҕо Анна Николаевна Зверева, «Нам улууһа» муниципальнай тэриллии культураҕа уонна духуобунай сайдыыга управлениетын начальнигын эбээһинэһин толорооччу Александра Николаевна Новгородова эттилэр. «САХА. Топографическай мэтириэттэр» быыстапка сэтинньи ыйга дылы М.К. Аммосов аат. культура уонна духуобунай сайдыы дыбарыаһын 2-с этээһигэр (быыстапкалыыр саалаҕа) турар. Кэлэн көрүҥ, сэргээн!
