М.К.Аммосов аатынан Нам улууһун култуура уонна дуохуобунай сайдыытын Дыбарыаһыгар Дьоллоох Дьокуускайтан Искусство уонна култуура арктикатааҕы судаарыстыбаннай института ыалдьыттаата. Үөрүүлээх көрсүһүүгэ Нам улууһун култуураҕа уонна духуобунай сайдыыга салалтата, норуот айымньыларын дьиэлэрин, култуура уонна сынньалаҥ кииннэрин, библиотекаларын, музейдарын, оҕо искусстватын оскуолаларын уонна Нам улууһун Үөрэх салаатын үлэһиттэрэ кыттыыны ыллылар.
«Нам улууһа» МТ баһылыгын солбуйааччыта Юрий Вячеславович Дьяконов эҕэрдэ тылынан арыйда, улууспут сайдыытыгар култуура эйгэтэ нэһилиэнньэ бигэ туруктаах көхтөөх буолуутугар сүрүн тирэх буоларын бэлиэтээтэ. Тэрээһин сүрүн соргунунан — Искусство уонна култуура арктикатааҕы судаарыстыбаннай института уонна Нам улууһун култуураҕа уонна духуобунай сайдыыга салаа инникитин ыкса ситимнээхтик үлэлэһиигэ торумнаммыт Сөбүлэҥи баттаһыы буолар.
ИуоКАСИ бастакы проректора, СӨ Общественнай палаататын салайаччыта, СӨ Үөрэҕириитин Үтүөлээх үлэһитэ Станислав Семенович Иванов, проректор, култуура народнай художественнай кафедратын сэбиэдиссэйэ, культурология кандидата, СӨ култууратын туйгуна Зоя Адреевна Стрекаловская, эбии үөрэхтээһин отделын сэбиэдиссэйэ Александр Константинович Лаптев институт туһунан сырдаттылар. Ону сэргэ, Нам улууһун култууратын эйгэтин үлэһиттэрин профориентация, эбии үөрэхтээһин чааһыгар кэккэ ыйытыыларыгар хоруйдаатылар. Нам улууһугар култура эйгэтигэр үлэлии сылдьар биир идэлээхтэрбитигэр Ректор Саргылана Семеновна Игнатьева илии баттааһыннаах Махтал суруктары ытыс дохсун тыаһыгар туттардылар.
Долгутуулаах бэлиэ көрсүһүүгэ Искусство уонна култуура арктикатааҕы судаарыстыбаннай институтун студеннара киэргэттилэр. Ол курдук, Монголияттан сылдьар Нямжав Оргилбаяр «Степной сын» үҥкүүтэ сүргэни көтөхтө, Алтай Өрөспүүбүлүкэтиттэн Александр Корчагин Топшуур музыкальнай инструменын доҕуһуолунан «Аргымак» хабарҕа ырыатын толордо, Степан Захаров уонна Егор Кузьмин баяҥҥа, балалайкаҕа оонньоон тэрээһини өрө көтөҕүүлээхтик түмүктээтилэр.
Бииргэ үлэлэһии үтүө түмүктэрин ситиһэргэ улуус, өрөспүүбүлүкэ култуурата чэчирии сайдарыгар туһуламмыт бу Сөбүлэҥ төһүү күүс буоллун!
