Тохсунньу 17 күнүгэр М.К. Аммосов аат. култуура уонна духуобунай сайдыы Дыбарыаһыгар кустук араас дьүһүнүн түһэрэн 92 саастаах, Яковлева Анна Дмитриевна “Кутум арылы кустуга” айар үлэтин быыстапкатын үөрүүлээх арыллыыта буолан ааста. Үөрүүлээх күҥҥэ эҕэрдэлэрин тиэртилэр «Хатырык нэһилиэгин” МТ баһылыга Артур Егорович Ноговицын, Нам улууһун култуураҕа уонна духуобунай сайдыыга управлениетын салайааччыта Семен Прокопьевич Ядрихинскай, үлэлээбит оскуолатын директора Павел Петрович Тимофеев, Нам улууһун үөрэҕин салалтатын информационнай – методическай үлэ сүрүн специалиһа Харитина Николаевна Павлова, улуус бэтэрээннэрин сүбэтин аатыттан Любовь Дмитриевна Бесчетнова, Намнааҕы художественнай галерея директора Екатерина Петровна Ширяева, “Кырадаһын” түмсүү салайааччыта Надежда Васильевна Соропова уонна үөрэппит оҕолоро. Төрөппүт оҕолорун ааттарыттан бааһынай хаһаайыстыба салайааччыта Попов Семен Иванович, аймахтар ааттарыттан З.П. Саввинов аатынан Үөдэй орто оскуолатын “Ийэ килбиэнэ” музей директора Алексей Дмитриевич Яковлев эҕэрдэлээтилэр. Ыалдьыттар истиҥ-иһирэх тылларынан эҕэрдэлээтилэр, сэмэй бэлэхтэрин туттардылар. Нам улууһун култуураҕа уонна духуобунай сайдыыга управлениетын салайааччыта Семен Прокопьевич “Нам улууһун норуот маастара” бэлиэни үөрүүлээх быһыыга-майгыга туттарда. Кириэстии быысыбай кыраҕы хараҕы, өҥү дьүөрэлээһини, тулууру, дьүккүөрдээх үлэни ирдиир. Анна Дмитриевна билигин да илиититтэн сөбүлүүр дьарыгын ыһыктыбакка быысабайдыыр. Оҥоһуктарын оҕолоругар, сиэннэригэр истиҥ иэйиилээх бэлэх оҥорор. Анна Дмитриевнаҕа баҕарабыт чэгиэн туругу, имигэс илиитинэн бигээн, ууран-тутан, чочуйан тикпит ииһэ бар дьону сөхтөрө, кэрэхсэтэ, умсугута турдун!
