Олунньу 6 күнүгэр, улуус баһылыга Юрий Слепцов култуура нэһилиэстибэтин эбийиэктэрин харыстааһыҥҥа Управление салайааччыта Николай Макаровы уонна департамент сүрүннүүр исписэлииһин Иннокентий Слепцову кытта көрүстэ.
Мунньахха улуус баһылыгын солбуйааччы Юрий Дьяконов, улуустааҕы культура уонна духуобунай сайдыы управлениетын салайааччыта Семен Ядрихинский, исписэлииһэ Сахаяна Орлова, Хатырыктааҕы М.К.Аммосов аатынан СР государственноһын историятын Өрөспүүбүлүкэтээҕи музейын сэбиэдиссэйэ Александр Кириллин, Н.М.Рыкунов аатынан Намнааҕы киин библиотека салайааччыта Майя Софронова, П.И. Сивцев аатынан Намнааҕы история уонна этнография түмэлин дириэктэрэ Александр Копырин, түмэл быыстапкаҕа салаатын сэбиэдиссэйэ Рустам Федоров кыттыыны ыллылар.
Мунньахха департамены кытта Нам улууһа бииргэ үлэлээһинигэр түһэрсиллибит Сөбүлэҥнэр икки боротокуолларыгар киирбит сорудахтар туолууларын сүнньүнэн кэпсэтии буолла.
2027 уонна 2032 сылларга Саха сирэ Россия государствотын састаабыгар киирбитэ 395 уонна 400 сылларын бэлиэтиэхпит. Бу сүдү бэлиэ дааталарга Нам улууһа историческай суолталаах. Онон бу боппуруоска улуус дьаһалтата СӨ тас сибээскэ уонна норуоттар дьыалаларын министиристэбэтин таһымыгар мунньах ыытары былаанныыр. Ону таһынан, бырайыак быһыытынан тутуллуохтаах «Саха олоҕо» культурнай, историческай уонна этнографическай комплекс, ааспыт күһүн улууска ыытыллыбыт археологическай үлэлэр отчуоттарын түмүгүн туһунан иһитиннэрии оҥоһулунна, кэпсэтии барда.
Нам улууһугар ураты харыстанар эбийиэктэр реестргэ киирэллэригэр үлэни салгыы күүһүрдэргэ сорук турар.
