Нерюнгри куоракка 15-с регионнар икки ардыларынааҕы научнай-методическай конференция иккис күнэ А.С.Пушкин аатынан культура уонна духуобунас киинигэр бэлиэтэнииттэн уонна панельнай сессияттан саҕаланна. Ол кэннэ 10 секциянан дакылааттары истии, 17 маастар-кылаастар ытылыннылар. Араас хайысхаларынан 75 научнай үлэһит эксперт быһыытынан үлэлээтэ. Уопсайа 16 улуустан 183 үлэ сайаапкаламмыт. Россия регионнарыттан, Хакассияттан, Туваттан, Татарстантан, Бурятияттан, Иркутскайтан уонна Москва, Санкт-Петербург куораттартан 15 эксперт үлэлээтэ. Нам улууһун Партизан, Хамаҕатта, Никольскай 1-Хомустаах, Нам, Аппааны, нэһилиэктэриттэн культура үлэһиттэрэ, фольклор специалистара, педагогтар, уһуйааччылар үлэлэрин уопутугар, бэйэлэрин көрүүлэригэр олоҕуран дакылааттарынан кытыннылар. Маастар-кылаастарга үөрэннилэр билиилэрин хаҥаттылар. Киэһээҥҥи программаҕа Нерюнгритааҕы кукольнай театр “Иччитэх тыйаатыр иччитэ” испэктээк көрдөрдүлэр. Тута хоһуйууга биирдиилээн толорооччуларга күрэххэ улууспут кэскиллээх олоҥхоһута Яна Ньургусова кытынна, араас улуустар олоҥхоһуттарын толоруутугар хомуур олоҥхоҕо П.П.Ядрихинскай-Бэдьээлэ аатынан олоҥхо дьиэтин фольклорга специалиһа Владимир Сыромятников, Партизантан “Хомус” ФДь “Дьүрүл” народнай ансамбыл уус-уран салайааччыта Мария Аргунова, 1-Хомустаахтан “Алгыс” НАК фольклор специалиһа Елена Руфова кыттан көрөөччү биһирэбилин ыллылар. 15 Регионнар икки ардыларынааҕы научнай-методическай конференция чэрчитинэн маастардар оҥоһуктарын быыстапката тэрилиннэ. Аны сайын Нам улууһа Нерюнгри куоракка буолар олоҥхо ыһыаҕыгар оҕо саас түһүлгэтин тэрийэн ыытарын туһунан иһитиннэрдилэр. Олус үчүгэй тэрээһиннээх, ып-ыраас соҕуруу дойдулуу моһуоннах Нерюнгри куоракка Олоҥхо ыһыаҕар кэлэрдии оҥостон дойдубутугар айаннаатыбыт.
