Саха төрүт үгэһин тутан олорор, норуот кутун-сүрүн тыына буолан, сырдыы сылдьар кэрэ дьонноох буоламмыт төрүт култуурабыт, ииспит-күүспүт сүппэккэ салгыы сайда турар. Кулун тутар 15 күнүгэр, Модут нэһилиэгин иккис дойду оҥостубут, Саха Өрөспүүбүлүкэтин уус-уран оҥоһугун маастара Куличкина Анна Афанасьевна айар үлэтин көрдөрөр “Өбүгэм сылаас тыына-иэйиим кылын таарыйан, оһуор-дьарҕаа тиһэбин” быыстапката Модут нэһилиэгин И.С. Охлопков аат. сынньалаҥ киинигэр үөрүүлээх-быһыыга майгыга арылынна. Анна Афанасьевна иистэммит ииһэ-күүһэ, анньыбыт ойуута-дьарҕаата кустук өҥүнэн дьэрэлийэ оонньоон, дьэргэлгэн курдук дьиримнии устан дууһаны умсугутар, сүрэҕи үөрдэр айымньылаах үлэтин Модут нэһилиэгин дьонугар-сэргэтигэр көрдөрөн, маастар кылаас ыытан бэлэх уунна.
