2025 сыл алтынньы 30 күнүгэр Нам улууһун култууратын эйгэтин үлэһиттэригэр «Ситимнээх үлэ сайдар саҕахтара» сүбэ мунньах ыытылынна.
М.К.Аммосов аатынан культура уораҕайыгар улуус култууратын эйгэтин үлэһиттэрэ тоҕуоруһа муһуннулар. Киирэр аантан төрүт дорҕоон алыптаах эйгэтинэн “А.Ф.Шестаков аатынан” норуот айымньытын дьиэтин “Нам кылыһах”, Хатыҥ-Арыы нэһилиэгин “Чороон” норуот айымньытын киинин “Дорҕоон” бөлөхтөрө көрүстүлэр.
Сүбэ мунньах пленарнай чааһа сахалыы сиэринэн алгыһынан саҕаланна. Киирии тылы улуустааҕы культура уонна духуобунай сайдыы салалтатын салайааччыта Семен Прокопьевич Ядрихинский мунньаҕы иилээн-саҕалаан ыытта. Улуус баһылыга Юрий Иннокентьевич Слепцов култуура эйгэтин үлэһиттэрэ хас биирдии нэһилиэккэ олох эргийэр киинэ буолуохтаахтарын, хас биирдии олохтоох култуура, духуобунас өттүнэн сайдыыта кинилэр үлэлэриттэн быһаччы тутулуктааҕын санатан эттэ. Хас биирдии хайысхаҕа үлэ былаана сөпкө торумнанан ыытыллыахтааҕын, култуура тэрилтэлэригэр салалта өттүттэн турар ирдэбилин иһитиннэрдэ.
2025 сылга улууска ыытыллыбыт образцовай култуура кииннэрин талыы күрэҕин кыайыылааҕыгар Хатыҥ-Арыы нэһилиэгин “Чороон” норуот айымньытын киинигэр туоһу сурук туттарылынна, салайааччы Саха Өрөспүүбүлүкэтин култууратын туйгуна Пономарева Саргылана Даниловна. Нам улууһа сайдыытыгар кылаатын иһин бэлиэни Арассыыйа дизайнердарын сойууһун чилиэнигэр, Петр Петрович Романов аатынан Дьокуускайдааҕы ойуулуур-дьүһүннүүр училище бырайыактыыр салаа салайааччытыгар, «ШКИ-Д» айар индустрия оскуолатын уус-уран салайааччытыгар Ариан Арианович Ермолаевка үөрүүлээх быһыыга туттарылынна.
Салгыы республика култууратын үлэһиттэрин идэлээх сойууһун билиҥҥи үлэтин туругун уонна соруктарын, идэлээх союз чилиэннэрин социальнай харысхаллаарын, инники киирээри турар уларыйыылар тустарынан Саха сирин култууратын үлэһиттэрин Өрөспүүбүлүкэтээҕи кэмитиэтин бэрэссэдээтэлэ Анастасия Ивановна Самсонова сиһилии билиһиннэрдэ.
Бырайыактыыр үлэ соруктарын уонна кэскилин улуус дьаһалтатын экэниэмикэ сайдыытын салаатын сүрүннүүн специалиһа, бырайыактыыр үлэни иилиир хамаанда чилиэнэ Айсиэн Сергеевич Жирков билиһиннэрдэ. Бу хайысханан ыытыллар үлэҕэ тэрилтэлэр ылсан көхтөөхтүк үлэлииллэригэр ыҥырда.
Виталий Петрович Артамонов аатынан Хамаҕатта саха-француз лиссиэйин саха тылын уонна литературатын учуутала Василий Николаевич Сивцев улууска ыытыллыбыт «Силис» этнокультурнай экспедиция үлэтин сырдатта, эҥсиэли хочотун культурнай кодун чинчийиини ситимнииргэ нэһилиэк култууратын кииннэригэр махтанан туран салҕыы ыкса сибээстээхтик үлэлииргэ ыҥырда.
Култуура эйгэтигэр сыыппара инструменнарын туһаныы туһунан Арктикатааҕы култуура уонна искусство институтун информатика кафедратын доцена, педагогика билимин кандидата Ольга Готовцева кэпсээнэ мунньах кыттыылаахтарын сэҥээриитин ылла. Ольга Герасимовна Эҥсиэли хочотун культурнай кодун айар бөлөҕүн үлэтин сырдатта. Хас биирдии нэһилиэккэ, култуура тэрилтэтигэр бу үлэ ыытыллыыта кэскиллээҕин, инник үүнэр көлүөнэ, ыччат дойдутунан киэн туттуутун, балысханнык сайдар үйэҕэ омук быһыытынан симэлийбэккэ хааларбыт сүрүнэ буоларын чопчулаан эттэ.
Социальнай-культурнай уонна үөрэх тэрилтэлэригэр уларыйа турар кэмҥэ кадрдар идэ өттүнэн бэлэмнээһин боппуруоһугар, дойду национальнай бырайыактарыгар кыттыыга кадрдары бэлэмнээһин туһунан Россия дизайнердарын сойууһун чилиэнэ, Петр Петрович Романов аатынан Дьокуускайдааҕы ойуулуур-дьүһүннүүр училище бырайыактыыр салаа салайааччыта, «ШКИ-Д» айар индустрия оскуолатын уус-уран салайааччыта Ариан Арианович Ермолаев сиһилии сырдатта. Ойуулуур-дьүһүннүүр училище саҥа үөрэх салаатыгар аныгылыы ирдэбилгэ эппиэттир специалистэри үөрэтэллэрин туһунан иһитиннэрдэ. Тэрилтэлэр бу салааҕа үлэһиттэрин үөрэттэрэллэригэр ыҥырда.
От ыйыгар т ыйыгар Нам улууһугар ыытыллыбыт илин эҥэр уонна киин улуустар культура үлэһиттэрин XIII спартакиадатын тэрээһинин туһунан улуустааҕы культура үлэһиттэрин идэлээх сойууһун кэмитиэтин бэрэссэдээтэлэ Александра Парникова иһитиннэрдэ. Тэрийэр үлэҕэ кыттыны ылбыт тэрилтэ салайааччыларыга идэлээх сойуус аатыттан махтал суруктары туттарда.
Күн иккис аҥарыгар хайысхаларынан үлэ ыытылынна. Библиотека, музей, оҕо искусствотын оскуолатын, культура кииннэрин үлэһиттэрэ хайысхаларынан мустан 2026 сыллааҕы былааны ырытыстылар, соруктары, кэскиллээҕи кэпсэттилэр. Саҥа көрүүлэри, бырайыактары олоххо киллэрэр туһунан сэһэргэстилэр. Өрөспүүбүлүкэтээҕи норуот айымньытын дьиэтин бырайыактыыр салаатын салайааччыта Кутугутова Анастасия Гектаровна специалистарынаан культура кииннэрин үлэһиттэригэр дьыалабай оонньуу ыыттылар, сонун бырайыактар кылгас кэм иһигэр толкуйданан сонун хайысхалары тобуллулар.
