От ыйын 7 күнүгэр М.К. Аммосов аатынан Култуура уонна духуобунай сайдыы Дыбарыаһыгар «Уруйдан-айхаллан, Эҥсиэли, Нам Сирэ!» диэн Улуу Туймаада Үрүҥ Тунах уонна XVI Өрөспүүбүлүкэтээҕи Олоҥхо ыһыахтарын айар куттаахтарын күрэстэрин, «Дыгын оонньуулара-2023» күөн күрэхтэрин, «Спортивные Якутяне» оскуола оҕолорун спартакиадатын, «Президентские состязания», «Президентские спортивные игры», Саха Өрөспүүбүлүкэтин Ил Дарханын бирииһигэр өрөспүүбүлүкэтээҕи дьөһөгөй сүүрдүүтүн улахан түһүлгэлэрин күрэхтэрин кыайыылаахтарын, кинилэр тренердэрин, тэрээһиннэр спонсордарын үөрүүлээх быһыыга-майгыга чиэстиир тэрээһин буолан ааста.
Улуус баһылыга Юрий Слепцов «Дыгын оонньуулара-2023», СӨ Ил Дарханын бирииһигэр өрөспүүбүлүкэтээҕи дьөһөгөй сүүрдүүтүн улахан түһүлгэлэрин, Улуу Туймаада Үрүҥ Тунах уонна XVI Өрөспүүбүлүкэтээҕи Олоҥхо ыһыахтарыгар, «Спортивные Якутяне» оскуола оҕолорун спартакиадатын, «Президентские состязания», «Президентские спортивные игры» күөн күрэхтэригэр Нам улууһун спортсменнара, айар куттаах дьоно, оҕолоро үрдүк ситиһиилэммиттэрин бэлиэтээтэ, маныаха тэрээһиннэр үрдүк таһымҥа барбыттарыгар спонсордар улахан кылааты киллэрбиттэригэр махталын тиэртэ. «Холобура, «Прогресс» тэрилтэ (сал. Алексей Пинигин) Нам улууһугар 3 нэһилиэккэ гран-при быһыытынан матасыыкыллары, улуус ыһыаҕар эмиэ улахан бириистэри туруоран дьоммут-сэргэбит сүргэтин көтөхтө», -диэн этэн туран, бары спонсордарга, кыайыылаахтарга Бочуотунай грамоталары, Махтал суруктары, бэлэхтэри туттарда.
Улуу Туймаада Үрүҥ Тунах ыһыаҕын түһүлгэтигэр «Дыгын оонньуулара — 2023» күрэхтэһии сэттэ түһүмэҕэр таһаарыылаахтык кыттан, муҥутуур кыайыылаах үрдүк аатын ылбыт Нам улууһун Түбэ нэһилиэгиттэн төрүттээх ыччаттарбытын — Вячеслав Дьяконовы уонна Дыгын Оонньууларын үһүйээҥҥэ киирбит аатырбыт спортмеммытын, күрэх 10 төгүллээх кыттыылааҕын, 3 төгүллээх үрүҥ көмүс призерун, быйылгы оонньууларга бочуоттаах 2-с миэстэни ылбыт Артем Варданяны Нам улууһун салалтата, дьоно-сэргэтэ, нэһилиэктэр баһылыктара, биир дойдулаахтара, түбэлэр, аймах-билэ дьоно уруйдаатылар, барҕа махтал тылларын тиэртилэр. Улуус баһылыга Юрий Слепцов Артем Варданяҥҥа «За вклад в развитие Намского улуса» бэлиэни уонна убаһа сертификатын, Вячеслав Дьяконовка убаһа сертификатын туттарда. Вячеслав Дьяконов тренерэ, «Дыгын оонньууларын» алта төгүллээх чөмпүйүөнэ Николай Викторович Дьяконовы — 75 тыһ., Артем Варданян тренерэ Юрий Афанасьевич Эверстовы – 50 тыһ. сертификатынан наҕараадалаата. «Түбэ нэһилиэгэ» МТ баһылыга Константин Федоров Артем Варданяҥҥа уонна Вячеслав Дьяконовка — 50-нуу тыһ., «Ленскэй нэһилиэк» МТ баһылыга Петр Сокольников 40-нуу тыһ. сертификаттары бэлэх ууннулар. Түбэ нэһилиэгин, Нам улууһун Ытык киһитэ, СӨ норуотун хһаайыстыбатын үтүөлээх үлэһитэ, өр сылларга Түбэ нэһилиэгэр баһылыгынан үлэлээбит Розалия Егоровна Лукина кэс тылын эттэ. Маны сэргэ аймахтара харчынан бириэмийэлэрин анаатылар. Наммыт улууһун боотурдарын — Вячеслав Дьяконовы «Дыгын оонньуулара — 2023» муҥутуур кыайыылааҕа уонна Артём Варданяны бочуоттаах 2-с миэстэ буолбуттарынан итиитик-истиҥник эҕэрдэлиибит уонна инникитин да Эҥсиэлибит хочотун ааттата туруҥ диэн алгыыбыт. Нам улууһун дьоно-сэргэтэ үлэни-хамнаһы кыайа туталларынан, күүстэринэн-уохтарынан, мындыр өйдөрүнэн биллэллэр. Ол курдук, биһиги киэн туттар уолаттарбыт Артём Варданян уонна Вячеслав Дьяконов чаҕылхай ситиһиилэрэ бүттүүн Саха сиригэр аатырар, улууспут спорка көрдөрүүтэ үрдүк таһымҥа тахсар. Нам улууһун дьоно-сэргэтэ эһигинэн киэн туттар, эһиги чаҕылхай кыайыыгыт бүтүн улуус спордун сайдыытыгар сүдү кылаат буолар! Уруй-айхал Нам улууһун аар саарга аатырдыбыт боотурдарбытыгар Артем Варданяҥҥа уонна Вячеслав Дьяконовка!
